Argao Beach Club

                                                                   Argao Beach Club

                                                                    by Cherryvier Y. Flores

       Ang lungsod sa Argao usa sa mga malambuong munisipalidad nga anaa nahimutang sa habagatang Sugbo. Na-ambunan ang lungsod sa daghang grasya gikan sa kina-iyahan, mga maanindot na mga lapyahan nga nailhan na kani-adto sa tibuok kalibutan.

      

      Dekada '80 sa dihang nailhan ang Argao Beach Club nga usa sa mga mahalalon og elegante nga beach resort sa Sugbo. Ang mga puti nga balas nga nagbanig sa kabaybayonan niini, tin-aw nga tubig ug ang maanindot ug abunda nga mga coral reefs ang nag-aghat sa nga banyaga ug lokal nga mga turista nga magpabilin sa maong lugar tungod sa kaanyag sa mga talan-awon niini.

      Sulod sa pipila ka tuig nailhan ug misikat ang ngalan sa Argao tungod sa maong resort. Ang Argao Beach Club gidagsa sa gatusan ka mga tawo matag adlaw, kini nagbuhi usab sa gatusan ka mga empleyado ug sa ilang mga pamilya. Apan sa pag-abot sa kagubot nga hinungdan sa eleksyon nga tali sa mga Marcos ug Aquino nihinay ang turismo. Gituohan usab nga ang Argao Beach Club gipanag-iya sa mga Marcos' ug nahagba kini kuyog sa pagka-hugno sa administrasyong Marcos.

       Karon ang nagpa-bilin nalang saksi sa kalampusan nga nakab-ot sa Argao mao ang mga na usik nga imprastraktura ug mga maanindot nga mga pasilidad nga kani-adto mapasigarbuhong gikadalit sa resort, apan nagpabilin gihapong maanyag ang dagat ug lapyahan nga anaa sa lugar.

     Ang mga dagat ug nagka lain-laing beaches diri sa Pilipinas usa sa mga nag-palambo sa turismo sa nasud. Ug kung taga-an lang ug pagtagad sa gobyerno ang Argao Beach Club kini dako ug matabang sa nga lumulupyo sa Argao, hilabi na sa lungsod ug kaha sa atong nasud. Ang  Departamento sa Turismo gi-awhag nga molihok sa pag-palambo ug balik sa maong lapyahan. Kini anaay dakong potensyal nga mag-malambuon pa ug balik.